Rangárþing eystra hlýtur viðurkenningu Jafnvægisvogarinnar

Á ráðstefnu Jafnvægisvogarinnar þann 12. október hlaut Rangárþing eystra viðurkenningu Jafnvægisvogarinnar, hreyfiaflsverkefnis FKA. Í ár bættust 11 sveitarfélög við vogina, 56 fyrirtæki og 22 opinberir aðilar og hafa aldrei verið fleiri viðurkenningar veittar. Þáttakendur eru þá orðnir 239 talsins.

Tilgangur Jafnvægisvogarinnar

• Að auka á jafnvægi kynja í efsta lagi stjórnunar fyrirtækja í íslensku viðskiptalífi með það að markmiði að árið 2027 verði hlutfallið á milli kynja a.m.k. 40/60 í framkvæmdastjórnum fyrirtækja á Íslandi
• Að virkja íslenskt viðskiptalíf til að verða að fyrirmynd jafnréttis fyrir aðrar þjóðir
• Að veita viðurkenningar og draga fram í sviðljósið fyrirtæki sem hafa náð markmiðum Jafnvægisvogarinnar
• Að standa fyrir viðburðum og fræðslu og vekja samfélagið til hugsunar um virði fjölbreytileika og jafnvægis
• Að taka saman heildræna stöðu og niðurstöðu greininga á stöðu stjórnenda í íslensku atvinnulífi og birta niðurstöðu

Jafnvægisvogin heldur úti mælaborði sem er ætlað að halda utan um tölfræðilegar upplýsingar um jafnrétti. Í mælaborði Jafnvægisvogarinnar koma fram allar helstu upplýsingar um stöðu kynjanna í íslensku atvinnulífi.