Safnahelgi á Suðurlandi 1. - 3. nóvember

Undirbúningur fyrir Safnahelgi á Suðurlandi er hafinn, en að henni standa Samtök safna á Suðurlandi.  Í ár verður safnahelgin haldin í fimmta sinn, helgina 1.-3. nóvember nk. Líkt og áður er það Dorothee Lubecki, menningarfulltrúi Suðurlands sem starfar að undirbúningnum ásamt nefnd sem í sitja tengiliðir af öllum svæðum á Suðurlandi, en um er að ræða starfssvæði menningarráðsins sem nær frá Ölfusi í vestri og allt til Hornafjarðar í austri. Um stærsta sameiginlega menningarviðburð svæðisins er að ræða og tóku á síðasta ári yfir sjötíu aðilar þátt með því að bjóða upp á margvíslega viðburði.

Vel hefur gefist að bjóða veitingaaðilum og lista- og handverksfólki  að taka þátt í hátíðinni og verður svo einnig þetta árið. Tónlistarfólk og í raun allir skapandi einstaklingar eru hvattir til að vera með og er vonast til að um safnahelgi verði boðið upp á fjölbreytta viðburði um allt Suðurland.

Þeir sem hafa áhuga á þátttöku eru hvattir til að hefja undirbúning og ákveða upp á hvað þeir ætla að bjóða. Upplýsingar um viðburði og uppákomur sendist til Árnýjar Láru, markaðs- og kynningarfulltrúa, á netfangið arnylara@hvolsvollur.is. Skráningarfrestur er til 4. október.
Allar nánari upplýsingar um safnahelgina verða að finna á vefsíðu menningarráðsins á veffanginu www.sunnanmenning.is og á facebook síðunni Safnahelgi á Suðurlandi